Dil hai Chota Sa

Somehow in the hustle bustle of life I managed to stop by and catch clips from Indian idol on Tata Sky. After the usual bicker and banter of judges a girl called Richa was voted of. As she tried to compose herself the strains of a song started in the background. Dil Hai Chota Sa Choti si Aasha.

Charon taraf ka mahaul kuch sanate sa tha, jaise awaazon par tala lag gaya ho, jaise andar se kuch toot sa raha ho. Udhar ek cutaway mein Javed Sahib ki aankhon mein ek aansoon dikha, idhar Richa ke chehre par se 2 boondein girin. Na Jaane kyun mujhe laga jaise mere ghar se door, zameen se ladti samundar ki lehron ki kuch boondein meri aankhon mein bhi aa gayi.

2 saal pehle India's best ek Reality hunt ka main bhi host tha. Jab pehli baar Famous Studio mein wo saare naujawaan mile the to unke chehre mein mujhe ek aaina dikhta tha apne beete huye dino ka. Koi bhatinda se to koi indore se, koi ma ka bandha taweez gale mein latkaye koi girlfirend ki picture purse ke kone mein dabaye aaya tha. Sab star ban na chahte the. Khush tha mein ki inka raasta shayad mujhse aasan ho. Waise uparwala mujhpar kafi meherbaan tha, ek din mein radio jockey, 2 mein Tv host, 3 mein ek company ka maalik...par shayad itna bada risk, Mumbai aane ka dar mujhse saha nahin gaya tha. Dilli mein khush tha, jab kismat ne mumbai ka rukh kiya to main haath thame chala aaya.

Pehla round tha, sab Mumbai ke nashe mein choor, Sitaron ke banglon ki sair karke, man hi man apne bangle banaye aaye the us round ke liye. 2 ghante tak toofan chalta raha. Koi naachta, koi gaata, judges bhi taaliyan marte, darshak ringmaster ki awaaz sunte hi taaliyan bajate, placard uthate.

Lekin aakhir humein 4 logon ko alvida kehna pada. Ek ek naam aisa lag raha tha jaise umar qaid ka farman court se jaari hua ho. 22 saal ke ladke secondon mein bilakte, sabki aankhon mein ek dar, agla naam mera na ho. Mujhe yaad hai woh raat main so nahin paya tha. Us din ek pal main bacchon ko bada hote dekha tha.

Agle 4 maheene mein meri chamdi bhi moti ho gayi thi, lams ki nami jaati rahi. har shoot par mein sochta kya behtareen ant hua show ka, aaj TRP aur aayegi. Show khatam hua, jaise laga gudde gudiya ki shadi ke beech kisi ko homework yaad aa gaya ho. Gudiya ka makeup adhoora reh gaya, gudde ki sherwani cheen li gayi. Kal ke bacche, zameen se uthaye huye, aasman par chadaye huye, apni jagah dhoondne lage us aasman mein, ab pata chala ki wo to poore brahmand mein phaila hai. Jitna apni jagah dhoondte utne chote hote jaate. Apni nazaron mein girte jaate. Lokhandwala market mein Mumbai ke anek berozgaar har shyaam matar gashti karte hain, ya phir zindagi ke maayne dhoondte hain, sachai se kuch aur ghante chup jaate hain. Aur phir ghar jaake apni tanhai se jhoojte hain. Ye sab mujhe wahin milte.

Kuch aaj Tv par hain, kuch filmein kar rahe hain apne balboote par. Kuch ghar wapas chale gaye hain. Aaj jab milte hain to ye manjhe huye Mumbai ke industry wale hain. Na woh sharm hai, na woh ehsaas, sab busy hain, sab ke peeche producer daud rahe hain, sabki film bus kal hi lagne wali hai.

Bache!! Kya shabd hai, kis se bacchei hain, kya bachaye hain jo hum inko bacchei kehte hai!

Aaj phir Indian Idol dekha, ek aur out hua, Anu ji ne acting karke apna gussa dikhaya, bichare itne bure actor hain ki koshish karke bhi sahi expression na de paaye. Anchors mein Husain ne ladki ko rulane ki koshish ki , wo nahin roi, baap ki tasveer dikhayi, wo nahin royi, doston ne thama, lekin wo nahin royi!!

Sab hairaan the, lekin sab bhool gaye the, ye bacche shayad itna ro chukke hain ki aansoo hi nahin bacche.

Chote se shehar, choti si aashayein, aur kabhi kabhi industry ki sacchai se jale registan jaise judges ke chehron mein ye bacche bhi ek pal ki barish karte hain, lekin phir registan ki jali huyi zameen ko apni sachai yaad aati hai, aur wo usse peekar sukhi ho jaati hai.